ILOILO CITY – Nagahanda na ang Iloilo City Government sa pagdeklara sang state of calamity bangud sa pagtaas sang kaso sang makamamatay nga dengue.
Sa pinakaulihi nga record sang Iloilo City Health Office, humalin sang Enero 1 tubtob Agusto 17, may yara na sang 775 ka total cases sang dengue sa diin tatlo na ang napatay.
Ini ang mas mataas sang 43.3% kun ipaanggid sang 2023 sa kaangay man nga period.
40 naman sa 180 ka mga barangay ang may clustering of cases kag duha ka barangay naman ang ginakabig nga hot spot areas.
Sa interview sang Bombo Radyo kay Iloilo City Mayor Jerry Treñas, iya ginpahayag nga padayon ang ginahimo nga tikang sang syudad agud matapna ang balatian nga dengue.
Ginapanugyanan man ang publiko nga sundon ang 4S strategy batok sa dengue nga: Search and destroy breeding places; Secure self-protection; Seek early consultation; kag Support fogging or spraying in hotspot areas.
Matandaan nga kahapon, ginpaidalom na sa state of calamity ang Iloilo Province bangud sa dengue outbreak.
