ILOILO CITY- Ginpakamalaot ni National Task Force to End Local Communist Armed Conflict consultant kag host sang Sonshine Media Network International nga si Jeffrey Celiz ang ginhimo sang Philippine National Police nga pag-convert sang Kingdom of Jesus Christ nga daw kaangay sang garrison.
Sa interview sang Bombo Radyo kay Jeffrey Celiz, iya ginpahayag nga iligal na kag pagpangbastos ang ginahimo sang kapulisan sa pagpanguna ni Police Brigadier General Nick Torre III, director sang Police Regional Office XI, sa sulod sang kingdom.
Suno kay Celiz, wala na ginatugutan sang kapulisan ang sin-o man nga myembro sang kingdom nga magsulod sa compound kag mangin ang mga abogado sang religious group ang ginastriktuhan man.
Dugang ni Celiz, wala man ginarespeto sang kapulisan ang compound bangud sa pagdinamak sang mga pulis nga nagapangihi sa bisan diin lang sa sulod sang compound.
Ginpahayag pa ni Celiz nga tuyo man ni Torre nga utdon ang linya sang kuryente kag tubig agud magutman kag mapilitan nga magbiya ang mga myembro sang grupo.
Sa subong suno kay Celiz, indi na maisip ang ginpangkumiter sang kapulisan nga violation sa tawhanon nga kinamatarung sang mga sumulunod ni Quiboloy.
May kaangtanan naman sa padayon nga pagpanago ni Quiboloy, ginpahayag ni Celiz nga ginahimo ini sang pastor bangud nagapati ini nga indi siya safe sa kamot sang otoridad sa tion nga magsungka ini.
Suno pa sa natungdan, self- preservation ang ginahimo ni Quiboloy bangud nasiguro niya nga indi siya paghatagan sang patas nga away sang administrasyon ni Presidente Ferdinand Marcos Jr.
