Posible nga mag-atras si former United States President Donald Trump sa naka-schedule nga presidential debate batok kay Vice President Kamala Harris sa Septyembre 10.
Ini matapos ginpasibangdan sini ang host nga ABC News nga indi patas sa Republican Party partikular ang pagtrato sa Republican Senator nga si Tom Cotton sang Arkansas sang gin-interview ini sang network sang nagligad nga adlaw.
Gintawag sini nga “ABC FAKE NEWS” ang network kag ginlaragway man nga biased ang interview sa iya kaalyado rason nga wala siya sang nakit-an nga rason suno kay Trump nga dayunon ang debate batok kay Harris nga amo ang official candidate sang Democrats para sa November presidential elections.
“I watched ABC FAKE NEWS this morning, both lightweight reporter Jonathan Carl’s(K?) ridiculous and biased interview of Tom Cotton (who was fantastic!), and their so-called Panel of Trump Haters, and I ask, why would I do the Debate against Kamala Harris on that network?” kabahin sang post ni Trump.
Una na nga ginpahayag sang Republican candidate nga nagsugot siya sa Septyembre 4 nga dabate sa Fox News nga network apang nagpangindi diri ang Harris campaign.
Antes ang komento ni Trump sa iya posible pag-atras, nag-guwa na ang reports kaangot sa ginabaisan nga regulasyon sa debate partikular ang paggamit sang microphone.
Gina-alegar sang reports nga gina-demand sang kampo ni Harris nga ipabilin nga naka-on ang mikropono bangud sa pagpati nga ang linya sang pagkwestyon sang bise-presidente ang magapainit sang ulo sang former president, bagay nga ginkontra naman sang Trump campaign kag gin-insister nga patyon ang microphone kun makatapos na ang turno sang kandidato.
