Gintawag ni Kingdom of Jesus Christ (KOJC) legal counsel Israelito Torreon nga ‘mission failure’ ang nagapadayon nga operation agud pangitaon si Pastor Apollo Quiboloy.
Ginpakamalaot man sini ang pahayag ni Davao Region police chief General Nicolas Torre nga yara pa si Quiboloy sa compound kun sa diin ginkutkot pa sang mga pulis ang pila ka areas.
Suno kay Torreon, kun nagapati ang pulis nga yara pa si Quiboloy sa KOJC compound, indi man kinahanglan nga magkutkot sang tunnel sa JMC basement nga isa ka eskwelahan nga ginapanag-iyahan sang entity nga separado gikan kay Quiboloy.
Gintawag man sini nga indi makatarungan ang tunneling operations sang PNP.
Ginpanginwala man sini nga may yara sang hulot nga ginapanag-iyahan si Quiboloy nga napalibutan sang iban nga kwarto kun sa diin nagatinir ang mga babaye kag menor de edad kag ginsiling nga isa ini ka attempt agud pakalainon pa gid ang pastor.
Gintawag man sini nga ‘dirty attempt’ ang pahayag ni Torre nga nakabaton siya kag iya pamilya sang death threats agud lamang nga makakuha sang simpatiya sang publiko.
Nahibaluan nga humalin pa sang Agusto 24 sang nag-umpisa ang operasyon sang PNP sa pagserbe sang warrant of arrest batok kay Quiboloy kun sa diin kapin sa 2,000 police forces ang nagtingob pwersa agud iserbe ang warrant.
