Ginkumpirma sang Department of Justice (DOJ) nga may kabaylo nga ginahingyo ang Indonesia antes sini itugyan sa Pilipinas si dismissed Bamban, Tarlac Mayor Alice Guo ukon ang Chinese national nga si Guo Hua Ping.
Suno kay Justice Secretary Jesus Crispin Remulla, gina-request sang Indonesian government nga ipadala man sa ila ang drug suspect nga si Gregor Johan Haas.
Mayo 15 sang naaresto sang Bureau of Immigration (BI) si Haas sa Bogo, Cebu kasunod sang Red Notice nga gin-isyu sang International Criminal Police Organization (Interpol).
Ginalaragway si Haas bilang isa ka “high-profile fugitive” nga ginaalegar miyembro sang Sinaloa cartel nga isa ka international organized crime syndicate nga naka-base sa Culiacan, Sinaloa, Mexico kag involved sa drug trafficking kag money laundering activities.
Base sa Indonesian authorities, may kahilabtanan si Haas sa tuyo nga mag-smuggle sa Indonesia sang Disyembre sang shipment sang floor ceramics nga may unod nga masobra lima ka kilo sang methamphetamine hydrochloride ukon shabu.
Ang pag-smuggle sang illegal drugs sa Indonesia ang isa ka krimen nga gina-silutan sang kamatayon.
Sa pihak nga bahin, una na nga ginpahayag ni Remulla nga lain ang proseso sa pagpapauli kay Alice Guo ipaanggid sa pagdala-pauli kanday Sheila Guo kag Cassandra Li Ong nga nadakpan sa Batam, Indonesia sang Agusto.
Nagapangatubang ang dismissed mayor sang sampaw-sampaw nga mga panumbungon diri sa Pilipinas lakip ang human trafficking nga naangot sa gin-raid nga Philippine Offshore Gaming Operator (POGO) hub sa Bamban.
Magluwas diri, may napasaka man nga money laundering complaint, quo warranto petition, kag petition nga ikansela ang iya birth certificate.
Magapadala pa ang DOJ sang team sang ila senior prosecutors kag agents sang National Bureau of Investigation sa Indonesia agud malantaw kag maproseso ang pagpabalik kay Alice Guo sa Pilipinas.##
