ILOILO CITY – Ginhatagan sang Philippine Red Cross sang Exemplary Blood Service award kag Top Performing sa Group Category ang flagship station sang Bombo Radyo Philippines.
Sa awarding ceremony, ginkilala sang Philippine Red Cross ang Bombo Radyo Philippines ilabi na ang Bombo Radyo Iloilo nga nagatib-ong sa National Voluntary Blood Service Program paagi sa Dugong Bombo.
Ginpasalamatan man sang Philippine Red Cross Western Visayas Regional Blood Center ang Bombo Radyo Iloilo sa masobra 15 ka tuig nga pag-upod sa bloodletting activity.
Ang Dugong Bombo nga isa ka corporate social responsibility sang network ang dululungan nga ginapatigayon sa tagsa ka Nobyembre sa 24 key cities nationwide nga may yara sang Bombo Radyo kag Star FM stations.
Nahibalu-an nga ang Dugong Bombo nga may slogan nga ‘A Little Pain, A Life to Gain’ ang ginbansagan nga bloodiest activity sa pungsod kag may katuyu-an nga makahatag sang bastante nga supply sang dugo para sa mga nagakinahanglan.
Magluwas sa Dugong Bombo, lakip man sa mga corporate social responsibility sang Bombo Radyo Philippines amo ang Bombo Medico nga nagahatag sang libre nga serbisyo medikal nga ginapatigayon sa tagsa ka bulan sang Hulyo kag ang Bombo Music Festival nga nagatib-ong sang Original Pilipino Music.
