Natalana nga mag-atubang sa Senado si dismissed Bamban, Tarlac Mayor Alice Guo subong nga adlaw, Septyembre 9.
Ginabanta 8:00 sa aga magabiya ang convoy ni Guo halin sa custodial facility sang Camp Crame pakadto sa Pasay City.
Suno kay Philippine National Police (PNP) spokesperson PCol. Jean Fajardo, nakahanda na ang security convoy para sa dismissed mayor, mga babaye nga pulis ang maga-escort sa iya, may SWAT ukon special weapons and tactics personnel, kag may iban pa gid nga security vehicle nga magasunod.
Magasuksok man ini sang bulletproof vest kag posas kun magpadulong sa Senado agud nga mangin resource person sa nagapadayon nga imbestigasyon sa iligal nga operasyon sang Philippine offshore gaming operators (POGOs).
Kabahin ini sang pagpanghanda suno kay Fajardo bangud indi dapat pagpabungol-bungulan ang ginaalegar ni Guo nga may death threat siya nga nabaton.
Kasunod man ini sang mandu sang Tarlac Regional Trial Court Branch 109 nga dapat may nagakaigu nga security para sa mga tawo nga napaidalom sa hurisdiksyon sang korte.
Nagpakig-angot man ang pulis sa Office of the Sergeant-at-Arms sa Senado halin sang Biyernes kag magasunod ang PNP pananglitan magasiling ang Senado nga kakasan sang posas si Guo kadungan sang inquiry.
Ginalauman nga hambalan sa Senado subong nga adlaw ang P7 billion nga gingamit bilang capital sa POGOs sa Central Luzon kag amo man ang pagpalagyo ni Guo kun sa diin ginaalegar naggamit pa ini sang doppelgänger ukon lookalike para nga makapalagyo siya sa otoridad.
