Magalawig pa ang pagtinir sang star point guard nga si Jamal Murray sa Denver Nuggets.
Ini matapos nagpirma ini sang kontrata kun sa diin may apat ka tuig nga extension sa team — buot silingon, magalab-ot pa sa 2028-2029 season si Murray nga amo man ang all-time leader sang Nuggets sa 3-pointers.
Ginapahayag nga nagadangat sa $208 million ukon P11.59-billion ang napirmahan nga contract.
Sang nagligad nga season, naka-average si Murray sang 21.2 points kag 6.5 assists, apang nakapasakop lamang sa 59 games bangud sa injuries.
Matandaan nga wala man ini nakit-an sa 2021-22 season bangud sa injury, apang nangin daku nga bagay ang iya pagbalik sang ginbuligan sini ang Nuggets nga makuha ang labing-una nga NBA title para sa franchise sang 2023.
Ginsundan ini sang regular season nga napuno na naman sang injuries nga ginalantaw man nga rason sang pigado sini nga performance sa Paris Olympics kun sa diin ginbangko ini sa kalabanan nga hampang kag nag-average lamang sang 6 points per game sa bilog nga Summer Games.
Sa Denver, siya ang ginakabig nga pick-and-roll partner sang three-time MVP nga si Nikola Jokic nga amo man ang naghatag sa Nuggets sang isa sa best offensive duos sa NBA.
