Nagaplano ang Pinoy pole vault icon kag Olympian nga si EJ Obiena nga magpatigayon ini sang pole vault clinics para makapangita sang masunod nga world-class nga atleta.
Ini ang pagatawgon niya nga “Six Meter Initiative.”
Suno kay Obiena, katuyuan niya nga masiguro nga may yara sang pasilidad sa bisan diin nga bahin sang pungsod para sa sin-o man nga luyag sudlon ang hampang.
Pahayag sang world No. 3 pole vaulter, subong ang tion nga engganyuhon ang mga kabataan nga tilawan ang sports ilabi na bangud nga nahimo sang Pilipinas ang all-time best Olympic campaign, matapos nakakuha sang duha ka gold kag duha ka bronze medals sa Paris Games.
Si gymnast Carlos Yulo ang pinakauna nga Olympic double gold medalist sang Pilipinas.
Samtang ang mga boxers nga sanday Nesthy Petecio kag Aira Villegas ang may bronze kada isa.
Sa bahin ni Obiena, diutayan lang sini gintapos ang 88 ka tuig nga paghulat sang Pilipinas sang medalya sa athletics matapos nga nakuha sini ang ikaapat nga pwesto.
Si Obiena ang nagpauli subong sa Pilipinas matapos nga wala sini ginpadayon ang iban nga kompetisyon bangud sa iya spine injury.
Natalana ini nga magpaidalom sa MRI scan kag malantaw sang iya mga doctor kun possible na ini magbalik sa training.
