Ginalantaw sang Department of Agriculture (DA) nga anum ka bulan ang ilawig para nga maaprubahan na ang mga naga-apply nga bakuna batok sa African Swine Fever (ASF).
Ini na ang best-case scenario nga ginplastar ni Agriculture Secretary Francisco P. Tiu Laurel sa tunga sang urgency sa sitwasyon subong sa pungsod.
“Due to the urgency of the situation, we are consulting with vets and other experts in this field on how to shorten the process of approval and trials. So, my best case is six months from now,” pahayag ni Laurel.
Suno sa tiglikom, naka-konsulta na ang ahensya sa veterinarians kag iban pa nga mga eksperto sa field para na ma-proseso ang approval kag trials.
Nahibaluan nga isahanon lamang ang AVAC ASF Live vaccine halin sa Vietnam nga naaprubahan sang Food and Drug Administration (FDA) para sa limited government-controlled rollout. Nagpaguwa ini sang Certificate of Product Registration para sa AVAC nga valid sa duha ka tuig kag subject sa monitoring kag annual evaluation.
Sini lang nga semana, gin-report sang DA nga may apat ka ASF vaccine manufactures nga nagapaidalom sa clinical trials kag ini nga suppliers ang nagikan sa Thailand, US, kag Vietnam.
Sa initial wave sang inoculations, ginpahayag sang DA nga nagalaum ini nga maka-deploy sang 10,000 doses sa katapusan sang September agud ma-address ang outbreak sa Batangas province.
Nagpain man ang DA sang P350 million agud magbakal sang 600,000 doses para sa hog farmers nga yara sa inisyal nga target. Nagsugod ang rollout sang Agusto 30 sa Lobo, Batangas.
