Handa nga magpungko sa Senado kag maghatag sang testimoniya ang madamo pa nga ginaalegar mga biktima ni Kingdom of Jesus Christ (KJC) founder Apollo Quiboloy.
Ini ang ginpahayag ni Senator Risa Hontiveros, chairperson sang Committee on Women, Children, Family Relations and Gender Equality, nga una na nakapatigayon sang hearings nga naangot sa ginaalegar sexual abuses nga ginhimo sang self-proclaimed Appointed Son of God.
“Papaharapin natin si Quiboloy at mga kapwa niya akusado sa Senado. Maraming biktima pa ang gustong mag-testigo para ipaglaban ang kanilang pagkatao, ang kanilang dignidad, at ang buong katotohanan,” suno kay Hontiveros.
Ang statement ni Hontiveros ang kasunod man sang pahayag ni Philippine National Police (PNP) spokesperson Col. Jean Fajardo nga nagatipon man sila sang dugang nga testimoniya kag mga ebidensya nga ginaalegar iya sang bag-o nga batch sang mga biktima ni Quiboloy.
Una na gindetalye nga nagpanugid ang mga biktima nga menor de edad sila sang ginhimuslan ni Quiboloy, gina-schedule kada semana, kag ginpapati nga pure kag intact gihapon ang ila pagkababaye matapos ang sexual activities sa pastor bangud nagapakighilawas sila sa espiritu sang Diyos.
Gin-alegar man nga ginsilingan sila nga ang ila pagpakighilawas sa pastor amo ang ila “pass” para makapalangit.
Sa sini nga mga ginaalegar pagpang-abuso, ginpahayag nga ginpahog man sila nga indi magpanugid bangud panglagson sila sang angels of death.
“Karapat-dapat managot sa batas si Apollo Quiboloy. He and his co-accused have caused unspeakable pain to women, children, and the most vulnerable,” dugang ni Hontiveros. “Ang pagpapaharap sa kanila sa hukuman ay isang malaking hakbang tungo sa ganap na hustisya.”
Kun matandaan, sang Enero pa lang, gindala na ni Hontiveros sa Senado ang ginaalegar biktima ni Quiboloy nga si alias Amanda nga amo gid ang una nga nagbulgar sang alleged sexual abuses. Paagi sa senado, nasapubliko sini ang ginaalegar nga systematic rape, abuse and exploitation nga ginhimo sang self-proclaimed appointed son of God.
“Partikular na nagpapasalamat tayo kay alias Amanda. Siya ang isa sa unang nag-testify in public, sa pamamagitan ng Senado, para isiwalat ang sistematikong panggagahasa, pang-aabuso, at pananamantala ni Quiboloy. Until now, her courage has inspired more victim-survivors to fight for justice. Kaya magpapatuloy ang aming Senate hearing,” pahayag pa sang senadora.
Kahapon, Septyembre 13, sang ginpaidalom sa arraignment ang pastor kag iya kaupod nga mga akusado kag pareho nga nag-plead sang not guilty.
Ang gin-isyu nga arrest warrants kay Quiboloy amo ang paglapas sa Special Protection of Children Against Abuse, Exploitation, and Discrimination Act amo man ang kaso nga qualified human trafficking.
Gin-indict man sang federal grand jury si Quiboloy sa US District Court for the Central District of California bangud sa conspiracy to engage in sex trafficking by force, fraud and coercion and sex trafficking of children; sex trafficking by force, fraud and coercion; conspiracy; kag bulk cash smuggling.#
