ILOILO CITY – Nagtambong si former Iloilo City Mayor Jed Patrick Mabilog sa hearing sang quad committee sa Kamara subong nga adlaw.
Ini nga mega-panel nga ginatawag man nga “quadcom” ang ginabug-usan sang House Committee on Dangerous Drugs, Committee on Public Accounts, Committee on Public Order and Safety, kag Committee on Human Rights.
Antes nagtakop ang ikalima nga joint hearing sang nagligad nga semana, nag-manifest si Committee on Public Order and Safety Chairperson kag Santa Rosa Lone District Rep. Danilo “Dan” Fernandez nga pakadtuon si Mabilog sa masunod nga schedule sang ila hearing.
Magluwas kay Fernandez, lakip man sa mga mamalidha nga nagduso agud mag-testify si Mabilog sa hearing amo sanday Abang Lingkod Party-list Rep. Joseph Stephen Paduano kag Iloilo City Lone District Rep. Julienne “Jamjam” Baronda.
Nahibaluan nga nakabaton ang anay alkalde sang verbal nga imbitasyon nga magtambong sa hearing.
Apang indi pa makahambal ang alkalde sa hearing.
Matandaan nga nag-abot si Mabilog sa Ninoy Aquino International Airport sang Martes, Setyembre 10, matapos ang pito ka tuig nga pagpuyo sa Estados Unidos sang Amerika.
Agusto 2017 sang nagbiya si Mabilog sa Pilipinas matapos nga gin-tag ini ni Duterte bilang narco-politician” kag ginasapubliko pa sang former president ang pamahog nga patyon ini bangud ginatum-ok sini si Mabilog nga protector sang illegal drug syndicates sa Western Visayas.
