May nakit-an na naman nga Chinese survey and research vessel malapit sa Palawan nga gina-updan pa sang anum ka barko sang maritime militia.
Ginsapubliko ini sang former US Air Force officer nga si Ray Powell nga director sang SeaLight nga isa ka maritime transparency project sa Gordian Knot Center for National Security Innovation sa Stanford University, California.
Suno kay Powell, naga-conduct ang China sang survey-in-force sa ginabanta distansya nga 27nm halin sa baybayon sang Pilipinas.
Base sa obserbasyon sang independent monitor, wala pa man nagsulod ang mga barko sa typical ‘lawnmower’ survey pattern, gani posible nga may mensahe lang sila nga gusto ipalab-ot kaangay sang impluwensya sang China sa rehiyon — kaangay man sa ila ginhimo sa Vietnam sang nagligad nga tuig.
Ang area nga gin-mensyonar ni Powell ang sulod pa sa exclusive economic zone (EEZ) sang Pilipinas.
Sandig sa nakasaad sa United Nations Convention on the Law of the Sea (UNCLOS), may kinamatarong ang foreign vessels nga maglabay kag magpatigayon sang overflight sa teritoryo sang iban pa nga pungsod, apang ang mas intrusive activities kaangay sang pag-survey ukon anuman nga sahi sang exploration ang dapat nga may pahanugot gid halin sa coastal state.
Indi ini ang una nga bes nga may Chinese research and survey vessels nga daw kaangay nga nagalagaw-lagaw lang sa dagat sang Pilipinas samtang nga mas labi pa nga naga-agresibo ang China sa pag-agaw sa West Philippine Sea.#
