ILOILO CITY- Naglab-ot sa kapin 25,000 ang gin-deactivate nga mga botante sa Iloilo City.
Sa interview sang Bombo Radyo kay Atty. Pinky Tentativa, Election Officer IV kag Legal Counsel sang Iloilo City Commission on Elections (COMELEC), iya ginpahayag nga kalabanan sa mga rason amo nga napaslawan nga makaboto ang mga ini sa duha ka sunod-sunod nga eleksyon.
Suno kay Tentativa, may iban man nga nagsaylo sang lugar sang registration.
Ginpahayag naman ni Tentativa nga sa pinakaulihi nga data, yara na sa 3019,294 ang registered voters sa syudad.
May yara man sang kapin 14,000 nga nagparehistro apang subject pa para sa approval.
Ginapanan-aw naman ang pagdagsa sang mga pumuluyo nga luyag magparehistro sa nabilin nga lima ka adlaw antes ang deadline sa Septyembre 30.
Sa bahin naman sang filing sang Certificates of Candidacy(COC) nga natalana sa Oktubre 1 tubtob 8, ginpahayag ni Tentativa nga ang final venue amo ang cinema sa 3rd floor sang Robinson’s Place.
Suno sa iya, madamo sang nangin konsiderasyon agud makahimo sila sang desisyon sa pagpili sang amo nga venue.
Ginplastar naman sini nga indi pagpahanugutan ang substitution magluwas lang kon napatay ukon na-disqualify ang isa ka kandidato.
Mahimo ang pagpa-substitute umpisa sa Nobyembre 15, 2024 tubtob sa Mayo 12, 2025.
Apang kinahanglan nga magkapareho ang apelyido sang substitute kag ang nagpabulos nga kandidato.
Ginapasugtan naman ang withdrawal sang candidacy paglapaw sa deadline apang wala dapat sang substitution.
