Ginakabig ni Iloilo 5th District Board Member Carol Espinosa-Diaz nga makaalarma ang mga nakit-an nga mga armado nga mga lalaki sa Ajuy, Iloilo.
Ini ang rason nga nagsulat ini kay P/Col. Bayani Razalan, Director sang Iloilo Police Provincial Office, agud nga maimbestigaran ang identity sang mga kalalakihan.
Sa sulat ni Board Member Diaz, nasaad nga ang mga wala nakilal-an nga mga lalaki ang nagabitbit sang long firearms kag nagasuksok sang battle gears.
Partikular nga gintumod sini nga petsa amo sang Septyembre 6, 2024 nga nakit-an ang mga lalaki nga nagalakat-lakat, ginaalegar may bitbit nga malaba nga armas kag deadly weapons, kag nakasuksok sang itom nga facemask.
Pahayag niya, kun himutaran, daw kaangay nga mga security guards ang mga lalaki apang nakatabon ang ila pangalan santu sa sulat ni Diaz sa IPPO Director.
Nalakip man sa sulat ni Diaz nga may isa ka Sangguniang Bayan member nga nagpamangkot sa mga lalaki kun sin-o ang nag-hire sa ila kag ginapahayag nga “Kay Mayor” ang ila nga nangin sabat apang wala na sila nagdugang pa sang detalye kag nagpadayon na sa paglakat.
Bangud sini , suno sa board member, nagtuga ini sang pagkaalarma kag kakulba sa pila ka mga pumuluyo sang Ajuy.
Nagahingyo subong si Diaz sa IPPO nga kun mahimo maimbestigaran kag mahibaluan ang identity sang armado nga mga lalaki kag kun may permit ukon lisensya ang ila ginabitbit nga long firearms kag luyag man sini mahibaluan ang pangalan sang ahensya kag kun licensed security personnel ang mga ini.
Bukas man ang Bombo Radyo sa sabat sang mga natungdan.
