ILOILO CITY- Ginhatagan na sang Iloilo City Council si Mayor Jerry Treñas sang otoridad nga magpirma sa loan agreement para sa nagapadayon nga rehabilitasyon sang mga merkado sa syudad.
Sa interview sang Bombo Radyo kay Councilor Rex Sarabia, Chairman sang Committee on Appropriations, iya ginpahayag nga may authority na si Treñas nga mag-apply sang P300 million nga loan sa Development Bank of the Philippines (DBP).
Suno kay Sarabia, sa nasambit nga kasugtanan, may interest rate nga 4% kada tuig ang loan kag mahimo nga bayaran sa sulod sang 15 ka tuig.
Pahayag sang konsehal, dako ang bentaha sini bangud sa mas manubo nga interest rate kun ipaanggid sa inflation rate sang pungsod nga yara sa 4.2%.
Gin-athag naman sang opisyal nga wala pa naglapaw sa ceiling sang debt servicing ang syudad.
Pagagamiton ang loan para sa second phase sang rehabilitation sang Jaro Big Market nga may dugang nga budget nga P100 million, Arevalo Public Market nga may dugang nga P120 million, kag La Paz Public Market nga may dugang nga P80 million.
Matandaan nga nag-utang man ang syudad sang P1.75 billion sa DBP para sa construction sang nasambit nga mga merkado.
