Nanginit na kag nagtaas ang tingog ni dismissed Bamban, Tarlac Mayor Alice Guo sang na-istoryahan liwat sa quad committee sang Kamara ang alegasyon nga isa siya ka Chinese spy.
Ang latest nga ginpakita sa quad comm amo ang documentary nga gin-release sang English-language news channel nga Al Jazeera kun sa diin na-feature ang preso nga Chinese gambling tycoon nga si She Zhijiang kag gintudlo sini si Guo nga espiya sang China.
Sa amo nga dokumentaryo, may mga pasabog si She nahanungod sa Chinese spies kag sa nagakatabo nga international conspiracy. Naangot siya sa scam sites nga na-involve sa human trafficking kag forced labor.
Sa interview sa iya sa presuhan, ginbulgar niya nga isa siya ka Chinese spy kag isa sa mga sikreto nga nabuyagyag sini ang naga-mensyonar kay Alice Guo.
Ginsiling sini nga naggamit siya sang handler’s mobile phone agud makontak si Guo Hua Ping ukon Alice sa Pilipinas, kag ginaalegar nga nagpangayo pa si Alice sang pondo para sa iya political campaign.
Base sa amo nga dokumentaryo, ginsiling ni She nga nahadlok na siya para sa seguridad kun ibalik siya sa China.
May mensahe pa ini kay Alice Guo ukon kay Guo Hua Ping nga indi masaligan ang China.
Suno sa iya, gindedikar nila ang ila kabuhi sa Chinese Ministry of State Security, apang kun indi luyag ni Guo nga mapatay suno sa iya, dapat nga isugid na niya ang matuod.
“Guo Huaping, China cannot be trusted. The two of us dedicated our lives to China’s Ministry of State Security. Look at what happened to me,” suno kay She. “If you don’t want to be eliminated, tell the world the truth.”
Ginsiling pa ni She Zhejiang nga nagpangayo si Guo sa iya sang pondo para sa 2022 campaign.
“Hindi ko po siya kilala. Gusto ko iparating sa lahat ng kababayan na mahal ko po ang Pilipinas. Hindi po ako spy. Totally hindi ako spy, hindi po ako nasa picture, hindi rin po ako ang sinasabi,” sabat naman ni Guo sa quad comm.
Sang ginpamangkot na ni PBA party-list Rep. Margarita Nograles kun ano ayhan ang mabenepisyo ni She sa pagbulgar sini sa pangalan ni Guo, nagsabat ang dismissed mayor: “I think it’s better for you po to ask him kasi siya ang naglabas ng video.”
Mangin sa chairman sang quad comm nga si Rep. Ace Barbers, nanginwala man si Guo kag ginsulit nga magapasaka siya sang kaso batok kay She.
“Hindi po ako spy. Mahal ko po ang Pilipinas,” pahayag ni Guo.#
