Nag-isyu sang paathag kag paandam ang Presidential Communications Office (PCO) matapos naglapta ang isa na naman ka video nga nagaangot kay President Ferdinand ‘Bongbong’ Marcos, Jr. sa paggamit sang iligal nga droga.
Yara sa isa ka pagtilipon si Marcos kag madamo ang nagapangamusta kag naga-selfie sa iya. Isa ka lalaki nga naka-pula ang nagpangamusta man sa presidente, apang may nakit-an sa iya kamot nga gindaho sini kay Marcos.
Ang mga kritiko ni Marcos ang madasig nga nagmuno kag gintawag ini nga “white substance”, gindugangan pa sang mga pag-edit sa video nga ginkomentuhan naman sang iban kag gin-angot sa droga.
Paathag sang Malacañang, isa ka lapel pin ang gindaho kay Marcos nga may logo sang iya partido nga Partido Federal ng Pilipinas (PFP).
Ginsiling pa sang PCO nga ginahingalitan sang iban ini nga content agud nga makapalapta sang sala nga mga naratibo.
“Some individuals are using these kinds of content to propagate a wrong narrative. If a video or photo is shared in the wrong context, it becomes easy for some to convince the public to believe in wrong information,” suno sa narrator sang video nga gin-post sang PCO.
Nagpanawagan man ang opisina sa publiko nga hibaluon anay ang kumpleto nga istorya sa mga video kag isa-isahon ang detalye antes magkomento sang sala.
“It was a simple act that was interpreted differently because of incomplete details … Releasing information without the proper context is an effective way to mislead the public,” dugang sini. “No one will be fooled if no one will allow themselves to be fooled.”
Nahibaluan nga pila ka beses na nga ginaangot si Marcos sa paggamit sang illegal drugs apang ginakadlawan lamang sini ang akusasyon. Sang nagligad, nagguwa man ang isa ka video nga may ka-itsura ang presidente nga nagagamit sang “white substance” apang nagguwa nga edited ini ukon deepfake.#
