Ginkumpirma sang Israel nga ginpatay nila paagi sa airstrike ang lider sang Hezbollah nga si Hassan Nasrallah nga isa man sa founding members sang amo nga militante nga grupo sa Lebanon.
Mangin ang Hezbollah ang naghatag man sang kumpirmasyon sa pagtaliwan sini kasunod sang pag-atake sang Israel sa ila central headquarters sa Dahiyeh sa nabagatnan sang Beirut.
Si Nasrallah, 64, amo ang nangin ikatatlo nga secretary-general sang Hezbollah sang 1992 matapos nga ginpatay man sang Israel ang anay lider sang grupo nga si Abbas al-Musawi.
Buot silingon, masobra tatlo ka dekada niya nga ginpamuan ang amo nga grupo kag isa siya ka dominant political kag military figure sa Middle East sa sulod sang malawig nga tion.
Nabutang ang iya pangalan sa lista sang palatyon sang Israel sa sulod sang malawig nga tinuig.
Magluwas sa iya, napatay sa amo man nga Israeli aistrike ang Iranian Revolutionary Guard general nga si Abbas Nilforoushan nga amo ang deputy commander for operations sang grupo.
Kasunod sini, nagpaguwa sang statement si Daniel Hagari, spokesperson sang Israel Defense Forces, nga nahatag na ang hustisya sa mga biktima ni Nasrallah indi lamang sa Israel kundi pati sa Argentina, Bulgaria, Syria kag Lebanon.
Ginsulit sini nga ginhungod gid nga ginbutang sang Hezbollah ang ila headquarters sa residential area sa Lebanon bangud gusto nila himuon nga taming ang mga tawo sa palibot.
