Ginalauman na ang lain-lain nga mga paandar sang mga kandidato kag ila mga supporters kadungan sang imbukada nga adlaw sang pag-file sang certificates of candidacy (COCs) para sa May 2025 midterm elections.
Tubtub sa Oktubre 8 ang ginhatag sang Commission on Elections agud nga makakadto ang aspirants sa areas nga gin-set sang poll body para maka-file sang kandidatura.
Pahayag ni Comelec Chairman George Garcia, all systems go na ini para sa sini nga hilukuton nga amo ang yara sa ila schedule insigida matapos nagtakop ang voter registration kahapon nga adlaw, Septyembre 30.
Batunon lamang sang Comelec ang tanan nga COC forms kun kumpleto ang nakasulat, na-notaryuhan, kag may nakabutang man nga documentary stamps.
Kabug-usan nga 18,280 seats sa 14 posts sa 254 legislative districts ang available para sa nagahilapit nga elections.
Una naman nga gin-athag sang Comelec en banc nga ginadumilian na ang substitution sang kandidato kun magtakop na ang deadline sa COC filing kun ang nahinambit nga substitution ang pagahimuon bangud lamang sa withdrawal sang kandidato.
Naghingyo naman si Atty. Dennis Ausan, regional director sang Comelec Region 6, sa aspirants nga i-check gid sang maayo ang ila nga mga requirements.
Suno kay Ausan, isa man ini ka pamaagi agud nga indi na sila mabudlayan pa nga magliwat-liwat.
Pahayag sini, ang tuyo lamang sang ahensya amo ang mapatuman sang insakto ang ila nga patakaran.
Gin-athag man sang natungdan nga dapat sulatan ang tanan nga items nga yara sa dokumento agud nga malikawan nga ma-reject.
Nagpangabay man si Ausan nga dapat fresh ukon bag-o ang mga signature nga gamiton sa pag-file sang candidacy kag likawan ang pag-print sini halin sa computer.
POLICE DEPLOYMENT
Masobra naman sa 3,000 ka mga pulis ang gin-deploy sang Police Regional Office 6 para sa pagsugod sang filing sang COCs.
Sa interview sang Bombo Radyo kay Police Brigadier General Jack Wanky, director sang PRO 6, iya ginpahayag nga kabilugan nga 3,265 ang i-deploy kun sa diin 931 ang personnel sa Iloilo Police Provincial Office sa 97 tanan ka COC filing areas.
201 naman ang iya sang Iloilo City Police Office sa 12 ka areas.
Suno kay Wanky, nagapakig-angot man sila sa Comelec para sa iban nga mga concerns may kaangtanan sa filing sang COCs nga kinahanglan ang presensya sang kapulisan.#
