Ginkumpirma ni Senator Ronald “Bato” Dela Rosa nga nabaton sang iya opisina ang komunikasyon halin sa International Criminal Court (ICC), apang wala niya ini ginsapak.
Si dela Rosa ang former police chief kag ginakabig nga architect sa drug war ni anay president Rodrigo Duterte.
Isa ang senador sa lima ka mga indibidwal nga sentro sang tuyo nga imbestigasyon sang ICC Office the Prosecutor kaangot sa pagpamatay nga natabo sang tion sang Duterte administration.
Una na ginpahayag ni Solicitor General Menardo Guevarra nga luyag sang ICC nga mag-arrange ang gobyerno sang interview sa mga people-of-interest,apang namalibad ang estado nga mag-facilitate, kun sa diin ginsiling niya nga possible sa gihapon nga magpatigayon si Prosecutor Karim Khan nga direkta nga mag- interview sang mga persons of interest.
Suno kay dela Rosa, may nag-contact sa opisina sini apang wala niya ginsapak bangud nagapanindugan ini nga wala sang jurisdiction ang ICC sa Pilipinas.
Apisar nga wala gin-confirm kag wala man gin-deny ni Guevarra, ang mga tawo nga luyag sang ICC prosecutor nga maistorya, nga pareho man sa nauna nga dokumento nga ginbalhag ni anay senator Antonio Trillanes IV ang naglakip kay Dela Rosa nga isa sa ila.
Ang iban nga apat amo sanday former police chief Oscar Albayalde, Northern Luzon Police commander Major General Romeo Caramat, former National Police Commissioner (Napolcom) commissioner Edilberto Leonardo, kag former police chief intelligence officer Eleazar Matta.
