Ginapalutaw ang mga posibilidad nga mahimo nga state witness ang anay paborito nga pulis ni former President Rodrigo Duterte nga si retired Police Colonel Royina Garma.
Ini kasunod sang mga ginpangbuyagyag ni Garma sa quad committee kaangot sa drug war kaangay sang reward system sa pagpamatay sa mga suspek nga gin-ilog suno sa iya sa template sang Davao.
Apang suno kay Surigao del Norte representative Robert Ace Barbers, overall chairman sang Quad Committee, nakadepende ini gihapon sa desisyon sang Department of Justice (DOJ) kun kuwalipikado si Garma nga mangin state witness ukon mangin benepisyaryo sang witness protection program sang gobyerno.
“Siguro titimbangin muna ng DOJ ‘yung kanyang ini-reveal niyang information kung qualified ba siya to be state witness or to be a beneficiary of the witness protection program ng ating gobyerno,” suno kay Barbers.
Suno kay Barbers nga chairman sang House Committee on Dangerous Drugs nga kaupod sa QuadComm, busision man sang DOJ ang ginpasa ni Garma nga affidavit nga ginbasa man sini sang nagligad nga hearing.
“(The DOJ is) doing their own investigation, yung kanyang interview sa mga witnesses na nagbigay ng testimonya before the Quad Committee. Ganun din siguro ang mangyayari kay Garma effective siguro by this week. Meron din siyang interview for preliminary investigation siguro,” dugang sang mamalidha.
Nahibaluan nga sang nag-retiro na si Garma sa pagka-pulis, nangin general manager ini sang Philippine Charity Sweepstakes Office (PCSO) sa idalom sang administrasyon ni Duterte.
Una na sini ginbulgar ang mga pangalan nanday Senator Christopher “Bong” Go kag National Police Commission commissioner Edilberto Leonardo nga may kahilabtanan man suno sa iya sa pagpatuman sang kampanya batok sa ilegal nga droga.
