Ginkumpirma ni Senator Ronald “Bato” Dela Rosa nga magatambong si former president Rodrigo Duterte sa hearing sang Senate blue ribbon committee sa Lunes, Oktubre 28, nga naangot sa war on drugs.
Suno kay dela Rosa, nagpasalig sa iya si Duterte nga magakadto ini bisan sin-o pa ang maga-preside sa hearing.
“The former President told me that he is going to attend the Senate hearing regardless of who is presiding,” pahayag sang senador.
Sini lang nga Biyernes, naka-post ang senador sang picture kun sa diin kaupod sini sa dinner ang former president, iya partner nga si Honeylet Avanceña, kag si former speaker Pantaleon Alvarez.
Si Senate Minority Leader Aquilino “Koko” Pimentel III ang maga-preside sa hearing santo sa naistoryahan sang mga senador kag gin-aprubahan ni Senate President Chiz Escudero.
Parallel investigation ini sa ginahimo sang quad comm sa Kamara nga naga-id-id man sa mga hitabo sa drug war.
Nahibaluan nga lakip sa mga imbitado sa Senate hearing amo sanday retired Police Colonel Royina Garma, former National Police Commission commissioner Edilberto Leonardo, former Senator Leila de Lima, Kerwin Espinosa, former Iloilo City Mayor Jed Patrick Mabilog, mga pamilya sang nabiktima sang drug, kag iban pa.
