Gintambakan sang defending champion nga TNT ang Barangay Ginebra sa Game 1 sang PBA Season 49 Governors’ Cup finals nga gintambungan sang 11,000 ka basketball fans subong nga gab-i.
Nagtakop ang una nga hampang sa best of seven series, 104-88, sa Ynares Sports Center sa Antipolo.
Sa imbukada pa lamang sang sambuwa, mapag-on na ang Tropang Giga nga may 27-15 nga abanse sa first quarter antes ang 43-37 lead sa first half.
Nangin Best Player of the Game si Rey Nambatac nga may malapit sa triple-double nga 18 points, 10 rebounds, 7 assists, kag 2 steals.
Tinguhaan sang Gin Kings sa pagpanguna ni Justin Brownlee kag Coach Tim Cone nga makabawi batok kanday Coach Chot Reyes kag Rondae Hollis-Jefferson sa Game 2 sa Miyerkules, Oktubre 30, sa Smart Araneta Coliseum sa Cubao.
Ini nga title duel subong nga 2024 amo ang rematch sa Governors’ Cup finals sang nagligad nga tuig kun sa diin gindis-og sang Tropang Giga ang Gin Kings sa trono kag gin-angkon ang ila labing-una nga kampyonato sa conference.
Away man ini sa tunga sang pinakaamayo nga imports — si Hollis-Jefferson sang TNT kag Brownlee sang Ginebra — matapos ginlutos ni RHJ si JB sa Best Import battle sang nagligad nga tuig kag amo man ang naghatag sa Gin Kings star sang iya una nga kapaslawan sa finals series.
Ini naman ang ikawalo nga finals appearance ni Brownlee kag nagatuyo nga makuha ang pang-pito na nga championship kaupod sa Ginebra nga amo ang magahimo sa iya bilang winningest import sa PBA history.
Una na nga ginpahayag sang PBA nga ang kita sa Game 1 sa finals series ang iga-donar tanan sa mga biktima sang Bagyo Kristine.#
The Scores:
TNT 104 – Hollis-Jefferson 19, Nambatac 18, Erram 15, Castro 14, Pogoy 12, Oftana 9, Aurin 8, Khobuntin 5, Williams 2, Heruela 2, Payawal 0, Galinato 0
GINEBRA 88 – Brownlee 23, J.Aguilar 14, Cu 13, Holt 12, Ahanmisi 10, Thompson 7, Abarrientos 5, Pinto 2, Tenorio 2, Pessumal 0, Mariano 0, Adamos 0
QUARTERS: 27-15, 43-37, 72-62, 104-88
