Pareho nga nagnubo ang trust kag performance ratings nanday President Ferdinand “Bongbong” Marcos Jr. kag Vice President Sara Duterte base sa latest survey results halin sa OCTA Research.
Santo sa survey nga naga-cover sang third quarter sang 2024, may “slight decline” sa numbers kay Marcos samtang “significant drop” naman sa record ni Sara.
Base sa resulta sang non-commissioned survey, yara sa 69% sang adult Filipinos ang nagasalig pa kay Marcos nga may buhin nga two percentage points halin sa 71% nga na-rekord sa second quarter sini nga tuig.
Sa pihak nga bahin, ang trust ratings naman ni Sara ang nagsarurot sang six percentage points halin sa 65% panaog sa 59%.
Kun basehan naman ang performance, 66% sang adult Filipinos ang nagpahayag nga kuntento sila sa performance ni Marcos samtang 12% ang dissatisfied, kag may 23% naman nga undecided.
Nagnubo ini bangud sa nagligad nga quarter, yara sa 68% sang adult Filipinos ang kuntento sa performance sang presidente base man sa amo nga survey.
Ang performance rating naman ni Sara ang nagnubo sang eight percentage points halin sa 60% panaog sa 52%.
Fifteen percent sang respondents ang dissatisfied sa iya performance samtang 33% ang undecided nga buot silingon suno sa OCTA may nagatubo na nga pagduha-duha sa electorate.
Nakuha ni Marcos ang iya highest trust rating sa Balanced Luzon nga may 78% kag ang lowest sa Mindanao nga may 50%. Ang respondents man sa Balanced Luzon ang most satisfied sa iya performance nga may 74% ipaanggid sa 48% sa Mindanao.
Sa pihak nga bahin, ang highest trust rating ni Sara ang napagkit sa Mindanao nga may 95% kag lowest sa Balanced Luzon nga may 43%. Ang performance rating ang steady man sa 90% sa Mindanao apang “poor” sa Balanced Luzon nga may 37% kag sa National Capital Region nga may 38%.
Ginpatigayon ang OCTA survey halin sang September 4 to 7, 2024 gamit ang face-to-face interviews sa 1,200 adults sa bilog nga pungsod.
May yara ini sang ±3% margin of error sa 95% confidence level.
