Ginahatag na nanday former President Donald Trump kag Vice President Kamala Harris ang bug-os sang ila masarangan sa ulihi nga mga inoras antes ang ginakalangkagan nga November 5 US elections.
Hingalitan sang duha ini nga tyempo para mag-deliver sang closing messages nga nagatuyo nga makumbinse ang minilyon nga mga Americano sa ila ihatag ang boto.
Nakalinya ang aktibidad sang Democratic presidential candidate sa Pennsylvania nga may 19 ka electoral votes nga amo ang lalagson kag ginalauman nga magatumod sang Electoral College outcome. Bisitahon ni Harris ang working-class areas lakip na ang Allentown.
Pagasundan ini sang star-studded rally sa Philadelphia karon sa gab-i nga maga-feature sang music superstars nga sanday Lady Gaga kag Oprah Winfrey.
Sa pihak nga bahin, may mga rally naman si Trump sa North Carolina kag Pennsylvania. Opisyal nga takpan sini ang iya kampanya sa Grand Rapids, Michigan.
Sa iya kampanya sa North Carolina sa bisperas sang eleksyon, gindeklarar na ni Trump nga nagapanguna siya sa piniliay kag ang ginahulat na lamang nila amo ang opisyal nga pagtakop sini.
Sa pihak nga bahin, sa iya rally naman sa Michigan, nag-apelar man si Harris sa Arab American and Muslim American population sa state kag nagpasalig nga gamiton niya ang kutob sang iya gahum agud tapuson ang gyera sa Gaza.
Ang Michigan puluy-an sang 240,000 registered Muslim voters nga mayorya nagboto sa Democrat nga si current President Joe Biden sang 2020.
Apang ini nga Arab Americans kag Muslim Americans ang una na nakapahayag nga diskumpyado sila sa panindugan ni Harris sa Gaza war gani ginatinguhaan sang Democrat presidential candidate nga makabawi.
Ang ginalantaw sang bug-os nga US nga naga-uyat sang lyabe sa kadalag-an nanday Harris kag Trump amo ang natumod nga battleground states nga amo ang Arizona, Georgia, Michigan, Nevada, North Carolina, Pennsylvania, kag Wisconsin nga mahimo mag-swing sa Democrats ukon sa Republicans subong nga 2024.
Magahatag ang Bombo Radyo Philippines sang latest updates sa “The American Vote 2024.
