Ginpadayon sang National Basketball Association (NBA) ang pagsunod sa tradisyon nga limpyuhon ang schedule subong nga adlaw kadungan sang Election Day sa Estados Unidos sang Amnerika.
Ini agud mahatagan sang ligwa ang mga empleyado sang liga, team workers, coaches, kag players nga gamiton ang ila nga kinamatarong nga magpili sang ila kandidato.
Madamo man nga prominente nga basketball coaches kaangay kanday Warriors head coach Steve Kerr kag Spurs head coach Gregg Popovich ang nagtulod kay Commissioner Adam Silver nga indi anay magpatigayon sang mga hampang subong nga adlaw.
“The scheduling decision came out of the NBA family’s focus on promoting nonpartisan civic engagement and encouraging fans to make a plan to vote during midterm elections,” suno sa liga kaangot sa amo nga polisa nga nagsugod sang 2022.
Sa pihak nga bahin, si Bucks guard Damian Lillard ang nagpangabay man sa mga botante nga dapat tungdan ang ila responsibilidad bisan matapos na ang eleksyon.
“Pay attention. Get informed,” pahayag sini sa recorded interview nga gin-ere sang NBA sang nagligad nga semana.
Nagpasakop naman ang liga sa National Vote Early Day sang Oct. 29.
Walo man ka NBA teams ang naggamit sang ila pasilidad bilang polling locations ukon ballot drop boxes.
Ang mga players kaangay kanday Celtics G Jaylen Brown, Bucks G Damian Lillard, Wizards F Kyle Kuzma kag Hawks F Larry Nance Jr. ang nagpakigbahin man sa public service announcements nga nagahaylo sa publiko nga magboto.
Nahibaluan nga may mga espesyal nga okasyon lamang nga wala sang naka-schedule nga hampang sa liga. Lakip ang Thanksgiving kag Christmas Eve sa holiday-related days nga may break ang NBA apang gindugang diri ang Election Day sang 2022 kag ginpadayon man sang nagligad nga tuig.#
