Ginpirmahan ni President Ferdinand Marcos Jr. ang administrative order nga nagahatag sang otorisasyon sa one-time grant sang rice assistance sa military kag uniformed personnel subong nga tuig.
Base sa Administrative Order 26, mahimo mahatag ang 25 kilograms sang bugas sa ila sa kondisyon nga yara sila sa active service as of November 30, 2024.
Yari ang mga ahensya nga na-cover sang latest order sang presidente:
Armed Forces of the Philippines
Philippine National Police
Bureau of Fire Protection
Bureau of Jail Management and Penology
Philippine Public Safety College
Bureau of Corrections
Philippine Coast Guard
National Mapping and Resource Information Authority
Mahimo ma-claim sang eligible personnel ini nga rice benefit halin sa Disyembre 2024 tubtub sa Marso 2025 sa designated warehouses sang National Food Authority (NFA).
Pagakuhaon ini nga one-time rice assistance sa local and participating farmers sang Kadiwa Program sang Department of Agriculture (DA).
Sa pihak nga bahin, nagpaguwa man ang palasyo sang Malacañang sang Memorandum Circular 73 kun sa diin gin-aprubahan ang implementasyon sang Micro, Small, and Medium Enterprise Development Plan 2023-2028.
Suno sa circular, ang pagpadasig sang digitalization kag innovation sa sini nga mga negosyo kag startups ang ginalantaw nga kabahin sang mga mayor nga estratehiya agud nga matib-ong pa ang industry sector sang pungsod.
May gin-isyu man ang Malacañang nga Memorandum Circular 74 nga naga-adoptar sang Philippine Development Plan for Culture and the Arts 2024-2029 nga naga-serbe nga ”national blueprint for the advancement of the country’s culture and arts sector.”
