Atubangon na sang Gilas Pilipinas karon sa gab-i ang longtime Oceania basketball powerhouse nga New Zealand sa second window sang FIBA Asia Cup 2025 Qualifiers.
7:30 ang game time sa Mall of Asia Arena sa Pasay City.
Ginahaylo ang Filipino basketball fans nga magsuksok sang “blue” bilang suporta sa national team kag bilang paghingalit sa homecourt advantage batok sa Tall Blacks nga pang-22 sa FIBA ranking.
Sa final 12-man lineup nga gin-release sang Samahang Basketbol ng Pilipinas (SBP), nakasaad nga magahampang para sa Gilas team sanday Justin Brownlee, June Mar Fajardo, Dwight Ramos, Kai Sotto, Scottie Thompson, Chris Newsome, Calvin Oftana, Japeth Aguilar, CJ Perez, Kevin Quiambao, Carl Tamayo, kag Mason Amos.
Wala pa naumpawan sa knee injury ang 6-foot-10 nga si AJ Edu kag indi pa liwat makahampang matapos nga na-miss man sini ang first window sang Asia Cup Qualifiers kag Olympic Qualifying Tournament.
Wala man sa pinal nga lineup sanday Jamie Malonzo nga may injury kag si Ange Kouame nga gin-tap ni Coach Tim Cone bilang backup kay Brownlee.
Patas ang Pilipinas kag New Zealand sa Group B nga may 2-0 win-loss records.
Ini ang ika ika-lima nga pagkitaay sa FIBA tournament halin sang 2016 kun sa diin wala gid nakaagi-daog ang Gilas.
Kinahanglan nga makuha sang Pilipinas ang isa sa duha ka nagapanguna nga pwesto sa grupo para nga maka-qualify sa FIBA Asia Cup 2025 nga natalana sa Jeddah, Saudi Arabia sa Agusto 5-17, 2025.
