Ginhangkat ni House Speaker Martin Romualdez si Vice President Sara Duterte nga personal nga magtambong sa hearings sang committee nga naga-imbestigar sa ginaalegar nga mga iregularidad sa paggamit sang budget sa Office of the Vice President (OVP) kag Department of Education (DepEd).
Miyerkules sang nag-resume ang inquiry sang House Committee on Good Government and Public Accountability nga nagabusisi sa ginaalegar nga fund misuse sa mga opisina sa idalom ni Duterte.
Nagtambong ang pila ka staff ni Sara lakip na ang chief of staff nag si Atty. Zuleika Lopez nga na-cite in contempt pa kag na-detain subong sa detention facility sang Kamara.
Tubtub subong, nagapakatig-a si Sara nga magtambong apang nagpahayag nga naluoy na gid siya sa iya mga staff nga ginagisa sang panel.
Pahayag naman ni Romualdez, dapat nga indi na pag-ipasa ni Sara sa iya staff ang responsibilidad sa pagpaathag sa mga ginapamangkot nga pondo.
“Eh ‘di dapat lang siyang sumipot at mag-oath at mag-salita at mag-eksplika dahil lahat ng mga opisyales niya… siya lang yata may alam kung anong nangyari diyan sa mga pondo eh kaya dapat siya ang mag-eksplika,” suno kay Romualdez sa ambush interview sa Albay.
“Wag na niyang ibigay sa mga officials niya sa OVP at sa DepEd. Sana lang magsalita,” dugang sang mamalidha.
Sa Lunes, Nobyembre 25, ang masunod nga hearing sang committee sa pagpanguna ni Manila Rep. Joel Chua.
Lakip sa initial findings sang panel amo ang makaduluda nga identities nga nasulat sa acknowledgement receipts nga ginpasa sang OVP agud nga ma-justify ang ila confidential expenses sa Commission on Audit. Lakip diri ang bantog na subong nga si “Mary Grace Piattos” nga wala sang may nakakilala kun sin-o.#
