Ginmandu sang Kamara ang pagsaylo kay Office of the Vice President (OVP) Undersecretary kag chief of staff Atty. Zuleika Lopez sa presuhan sang mga babaye sa Mandaluyong City.
Base ini sa dokumento nga ginpaguwa ni House committee on good governance and public accountability chair kag Manila Rep. Joel Chua nga nagasugo kay House Sergeant-At-Arms Napoleon Taas nga isaylo gilayon si Lopez sa Women’s Correctional Facility halin sa detention facility sa Kamara.
Ang mandu ang kasunod sang special meeting sang committee sa Kamara kun sa diin unanimous ang desisyon sang mga miyembro kaangot sa transfer order.
“You are hereby ordered to effect the transfer of Atty. Zuleika T. Lopez. from her detention in the House of Representative to the Women’s Correctional Facility, Mandaluyong City, immediately, so ordered,” pahayag sang order.
Antes sini, yara si Lopez sa kustodiya sang Office of the Sergeant-at-Arms matapos nga gin-cite in contempt sang panel sang nagligad nga Myerkules bangud wala sang direkta nga mga sabat sa mga kongresista kaangot sa mga pamangkot sa confidential funds ni Vice President Sara Duterte.
Gintumod nga rason ang “undue interference” rason nga gin-aprubahan ang contempt order.
Base sa nauna nga desisyon sang House committee, tubtub sa Nobyembre 25 si Lopez sa House detention facility nga amo man ang pag-resume sang hearing sang panel kaangot sa disbursement sang confidential funds sang OVP kag Department of Education sa idalom anay ni Duterte.
Pagkatapos nga na-detain si Lopez, nagpadulong naman si Sara sa Kamara kag nagdeklarar nga magatinir siya sa opisina sang iya utod nga si Davao City 1st District Rep. Paolo Duterte bisan tubtub sa Bag-ong Tuig agud nga mabisita sini si Lopez.
Apang bangud sa paglain sang desisyon kagab-i, naghilibion ang chief of staff kag nagasinggitan sang hustisya.
Sa press conference paagi sa Zoom, ginpahayag sang abogada nga ginabanta siyam ukon 10 ka mga tawo lakip na ang mga pulis ang nagtuhaw sa hulot agud iserbe ang transfer order sa iya apang nagpakatig-a siya nga mag-comply.
Ginsiling sini nga nakahibalo siya sang iya mga kinamatarong bilang detainee gani naghingyo siya nga sang iya abogado kag gintawagan man si Vice President Sara nga amo na lang ang magatindog bilang legal counsel.
Ginkwestyon man ni Lopez kun ngaa iserbe sang House committee ang transfer order antes pa man aktuhan ang iya motion for reconsideration.
Indi lang ini harassment suno sa iya kundi isa ka maathag nga pamahog sa iya kabuhi kag isa ka paglapas sa layi sang Pilipinas.
Sa nauna nga press conference ni Sara, ginpuno sini sang atake si House Speaker Martin Romualdez. Sa separado nga video, ginbuyayaw na sini si Romualdez kag ginsiling nga bisan makakas niya ang bise-presidente sa presidential race, indi man gihapon ini magdaog sa pagka-presidente bangud wala sang may maboto sa iya.
Sang Huwebes sang katapusan nga naka-ere sang iya statement si Romualdez nga nagahangkat kay Sara nga mag-atubang sang personal sa Kamara sa baylo nga ihatag sa iya staff ang katungdanan nga magsabat sa mga pamangkot kaangot sa paggamit sang confidential funds.#
