Nagpaandam ang Department of Health (DOH) nga posible nga magdamo ang breeding areas sang lamok nga makadala sang dengue virus kasunod sang anum ka sunod-sunod nga mga bagyo nga nag-igu sa Pilipinas.
“Matapos ang sunud sunod na bagyo, maaaring mas marami ang mga nakatenggang lugar na may tubig. Dito namumugad ang mga lamok na nagdadala ng dengue virus,” suno sa ahensya.
Sa advisory sini, ginpahanumdom sa publiko nga dapat nga i-check ang nagapundo nga tubig sa palibot.
Dapat man magpakonsulta gilayon kun makabatyag sang sintomas sang dengue partikular na sa mga rehiyon nga apektado sang tropical cyclones nga Kristine, Leon, Marce, Nika, Ofel, kag Pepito.
Nahibaluan nga may masobra 17,000 ka recorded cases sang dengue halin sang October 20 to November 2, 2024 nga 17% nga mas manubo ikumpara sa 20,498 ka mga kaso sang October 6 to 19, 2024.
Wala pa sang reports nga may pagsaka sang dengue cases sa mga rehiyon nga apektado sang bagyo sa nagligad nga anum ka semana.
