𝗣𝗔𝗦𝗦𝗜 𝗖𝗜𝗧𝗬 – Nagapanawagan sang hustisya ang pamilya sang isa ka Corps Commander kasunod sang ginhimo nga hazing sa iya sang mga upod sini sa Reserve Officers’ Training Corps (ROTC) sa Passi City College sa Passi City, Iloilo.
Ang biktima amo si JP Mombay, 3rd year criminology student.
Sa interview sang Bombo Radyo kay Romel Mombay, amay sang biktima, iya ginpahayag nga nag-umpisa ang nabatyag nga depression sang biktima antes kag matapos ang training sini bilang Corps Commander.
Suno kay Mombay, gin-ako mismo sang biktima nga gin-blindfold ini, ginhampak sang paddle kag ginkastigo sang iya mga upper class bilang kabahin sang initiation.
May mga pictures man ini nga ginpadala sa iya girlfriend sa diin makit-an nga puno ini sang lagob.
Magluwas diri, nagasuka man ini sang dugo.
Ginpahayag sini nga nakibot na lang ini sang nahibaluan nga naghikog na ang biktima sa sulod sang iya boarding house sa Tubod, Passi City.
Desidido naman ang pamilya nga pasakaan sang kaso ang mga nagpatigayon sang hazing sa iya anak.
Bukas naman ang Bombo Radyo sa paathag sang Passi City College.
[SUICIDE PREVENTION HOTLINE CENTER FOR HEALTH DEVELOPMENT – WESTERN VISAYAS]
1-800-10-333-8336
09985324047
09255469919
WVSUMC – 3202431 loc. 162 or 209
3292360
WVMC – 3211797 loc. 186
5037708
PMHU – 5298109
