Nagpasalig ang Philippine Health Insurance Corporation (PhilHealth) sa mga miyembro sini nga padayunon sini ang paghatag sang health benefits apisar sa desisyon sang bicameral conference committee nga kakason ang ahensya sa pagahatagan sang government subsidies sa 2025.
Sa video statement ni PhilHealth President kag Chief Executive Officer (CEO) Emmanuel R. Ledesma, Jr., ginplastar sini ang financial strength sang ahensya kag ang ila commitment sa tanan nga mga miyembro sang state insurer.
Suno sa natungdan, nahangpan sang bicam ang kapasidad sang PhilHealth nga magpadayon sa pag-manage sa National Health Insurance Program gamit ang ila sobra subong nga pondo.
“The decision of the Bicameral Conference Committee reflects its wisdom. The Bicam understands PhilHealth’s capacity to continue managing the National Health Insurance Program given its surplus funds,” suno kay Ledesma.
Ginpahayag sini nga as of October 2024, may pondo pa ang PhilHealth nga nagadangat sa P281 billion kag may surplus funds nga P150 billion. Magluwas diri, ang investment portfolio sang ahensya ang nagalab-ot sa P489 billion as of November 2024.
“We are deeply aware of the impact healthcare costs have on Filipino families, and we remain dedicated to enhancing our benefits packages and reducing out-of-pocket expenses so that every patient feels the security of their health insurances,” dugang pa sini.
Pahayag sang PhilHeath president, magapabilin nga operasyon sang ahensya kag pasangkaron pa gid nila ang serbisyo bisan nga wala na sang subsidiya halin sa gobyerno.
“Rest assured: all PhilHealth benefits will continue to be paid, and will even improve,” dugang niya.
Gindugang sini nga preparado ang PhilHealth nga mag-atubang sa anuman nga pagpanghangkat samtang nga ginapabakod sini ang ila papel sa healthcare system sang pungsod.
Matandaan nga una na nagdepensa si President Ferdinand Marcos Jr. sa tikang sang mga kongresista kag senador nga hatagan sang zero government subsidy ang ahensya.
Suno sa presidente, “the reason why we do not want to subsidize is because the subsidy, uupo lang sa bank account ng PhilHealth. Hindi magagamit…That’s the simple explanation. They have sufficient funds to carry on”. #
