Ginrekomendar sang Commission on Audit (COA) ang mas strikto nga mga tikang kalakip na ang pagpugong sa mga sweldo kag pagdagdag sang penalidad batok sa mga opisyal sang Department of Education (DepEd) ng napaslawan nga ma- liquidate ang cash advances (CAs) nga nagabalor sang tubtob sa Php 6.96 billion as of December 31, 2023.
Sa 2023 Annual Audit Report, ginsita sang COA ang kapalpakan sang DepEd nga magsunod sa layi kag regulasyon nga nagresulta sa unliquidated CAs.
Ang mga anomaliya nga nakit-an ginalakipan sang paghatag sang CAs nga wala sang nagakaigo nga otoridad, pagsaylo sang pondo sa tunga sang accountable officers (AOs), kag pagbayad sang expenses kaangay sang Service Recognition Incentives (SRI) paagi sa CAs sa baylo nga direkta nga bayad.
Base sa report, ang top regions nga may pinakamataas nga unliquidated balances amo ang:
Region VII (Central Visayas) nga may P1.31 billion
Region VIII (Eastern Visayas) nga may P1.01 billion
Region XII (SOCCSKSARGEN) nga may P819.4 million
Region IX (Zamboanga Peninsula) nga may P537.1 million
Region VI (Western Visayas) nga may P513.9 million
NCR (National Capital Region) nga may P301.9 million.
Agud mahatagan ini sang igtalupangod, ginrekomendar sang COA ang mga masunod:
-Pagpauntat sa paghatag sang bag-o nga cash advances sa mga opisyales nga may pending balances
-Pag-issue sang demand letters sa mga active employees agud ma-obligar ang liquidation
-Punggan ang sweldo kag dues sang mga delinquent AOs tubtob ma-settle ang ila obligasyon
-Pagdagdag sang penalidad sa idalom sang pagsulundan sang Civil Service Commission (CSC) bangud sa delays
-Pagpanas sang mga dormant accounts nga wala maresolba sang masobra isa ka dekada
Ang report nagasiling man nga sa pila ka mga kaso, ang outstanding balances nagalakip sang accountable officers nga nagretiro, nag-resign, nag-“absent without leave” (AWOL), ukon nagsaylo, nga labi pa nga nagpabudlay sang recovery process.
