Gin-ako ni Warriors superstar Stephen Curry kun daw ano ka makahuluya ang 51-puntos nga abanse nga gintambak sang Memphis Grizzlies batok sa pangayaw nga Golden State sa ila hampang subong nga regular season, 144-93.
Sa 24 minutos nga playing time, dos puntos gid lamang ang nahimo ni Curry nga amo ang pinakamanubo sini nga na-skor sa isa ka hampang sa iya 16-anyos nga karera sa liga. Gindugangan ini sang three rebounds, one assist, one steal kag one block.
Ang iya teammate nga si Draymond Green ang wala gid naka-puntos, wala sang rebound, wala sang block, wala sang assist, kag may isa gid lamang ka steal sa sulod sang 19 minutos nga paghampang.
“We ran into a buzz saw,” suno kay Curry. “We obviously know we are better than that. I’ve got to be better than that.”
“That was embarrassing,” pahayag pa sini.
Nakadangat pa sa 57-puntos ang abanse sang Grizzlies antes nagtakop ang hampang nga 51 puntos ang gap sa ila scores. Ini nga final margin kag point deficit amo ang pinakadaku nga na-rekord subong nga season.
Ini ang ika-lima nga tion sa maragtas sang Warriors nga nalutos sila sa hampang sa regular season sa masobra 50 puntos. Sa sining lima, tatlo ang natabo sa sulod lamang sang lima ka tuig — 53 puntos sa Tampa, Florida sang 2021; 52 puntos sa Boston sang Marso 2024; kag 51 puntos sa Sacramento, California kahapon sang aga PHT.
Ini nga hampang amo man ang debut ni Dennis Schroder sa Warriors halin sang gin-trade ini sang Brooklyn Nets. Nagtapos siya nga may five points kag five assists.
Sa pihak nga bahin, gina-selebrar naman sang Grizzlies (19-9) ang ila duha ka daku nga kadalag-an subong nga regular season. Magluwas nga ginpahuy-an ang Warriors (14-12), ginlutos man nila ang Portland Trail Blazers sang Nobyembre 10 paagi sa 45 puntos nga abanse.
