Ginbali sang Philippine Coast Guard (PCG) ang pahayag nga ginbuy-an sang Chinese Coast Guard (CCG) kaangot sa aircraft kag barko sang Pilipinas nga yara sa Bajo de Masinloc.
Suno kay Commodore Jay Tarriela, PCG spokesperson for the West Philippine Sea, ang mga barko sang PCG kag aircraft sang BFAR ang nagpatigayon sang lehitimo nga pagpatrolya sa amo nga kadagatan para masiguro ang safety kag seguridad sang mga manugpangisda nga Pinoy.
Dugang ni Tarriela, nagbiya ini nga mga barko kag aircraft sang boluntaryo matapos nakumpleto ang ila misyon nga hatagan sang mga suplay ang Filipino fishermen.
Gin-athag sang natungdan nga ang ila pagbiya ang indi bangud sa pagtabog sa ila sang Chinese Coast Guard.
Antes ini nga statement, gin-alegar sang China nga nagsulod ang Philippine aircraft sa ila gina-claim nga Chinese airspace.
Sulod ang Scarborough Shoal sa exclusive economic zone (EEZ) sang Pilipinas apang ginapanindugan sang China nga ila ini teritoryo.
Nag-release man sang statement ang Chinese embassy in Manila nga naga-akusar sa Pilipinas nga naglapas sa territorial sovereignty kag maritime rights sang China. Nangayo pa ang Chinese government sang paathag halin sa Philippine Embassy in Beijing kaangot diri.
Matandaan nga gin-report man sang PCG sang Huwebes nga 12 tanan ka Chinese vessels ang ila nakit-an nga nagapalibot malapit sa Bajo de Masinloc lakip ang iya sang China Coast Guard, Chinese maritime militia, kag People’s Liberation Army Navy (PLAN).
