Ginalantaw sang Philippine Army ang pag-angkon sang weapons systems ukon platforms nga magahatag sa ila sang dugang nga kapasidad agud nga mapangapinan ang 200-nautical mile exclusive economic zone (EEZ) sang Pilipinas nga ginaagaw sang China.
Suno kay Philippine Army chief Lt. Gen. Roy Galido, isa diri amo ang ginhimo sa Estados Unidos sang Amerika nga “Mid-Range Capability” (MRC) “Typhon” Missile System.
Ginakonsiderar ang “Typhon” suno sa natungdan bangud sa feasibility kag sa functionality sini sa konsepto sang Comprehensive Archipelagic Defense implementation.
“It is planned to be acquired because we see its feasibility and its functionality in our concept of archipelagic defense implementation,” suno sa commanding general.
“I’m happy to report to our fellow countrymen that your army is developing this capability for the interest of protecting our sovereignty,” dugang sini.
Makasarang ang Typhon missile system sa pagpalupad sang Tomahawk Land Attack Missile kag Standard Missile-6 kag ginapatihan nga may range nga masobra sa 1,000 miles.
Matandaan nga gin-deploy anay sang US military ang mid-range missile system sa northern Philippines sa temprano nga bahin subong nga tuig para sa annual joint military exercises.
Gindesisyunan man nga ibilin ini didto bisan pa nga ginpakamalaot ini sang China. Halin sang amo nga tion, gingamit sang pwersa sang Pilipinas ang amo nga missile system para sa paghanas sa mga operasyon.
Base sa pagsulundan duha ka tuig ukon masobra pa antes makaangkon ang Philippine military sang bag-o nga weapons system kun isipon pati ang planning stage.
Magluwas diri, wala pa ini nadala sa budget nga ginduso para sa 2025.
Suno kay Galido, kun may Typhon system ang Pilipinas, mahimo makapalupad ang army sang tubtub sa 200 nautical miles (370 kilometres) nga amo ang limit sang maritime entitlements sang Pilipinas sa idalom sang United Nations Convention on the Law of the Sea.
“You have to take note of the fact that at 200 nautical miles there is no land there and the army cannot go there,” pahayag ni Galido. “We need to contribute to this (defence of Philippine interests) by having this platform to be able to assist the primary major service that would focus on maritime and air domain.”
Sa senaryo nga ini, ginalauman nga maproteksyunan sang Typhon ang floating assets sang Pilipinas ukon ang mga barko sang Philippine navy, coast guard kag iban pa gid nga vessels.
“We should not be bothered by others’ seeming insecurities because we don’t have any plans to go outside of our country’s interests,” sabat naman sang natungdan kaangot sa matunog nga pagpamalabag sang Beijing sa plano sang Pilipinas.#
