Nagsaka na sa 43 ang na-rekord sang Department of Health (DOH) nga firecracker-related injuries sa Pilipinas samtang mas nagahilapit ang selebrasyon sang Bag-ong Tuig.
Suno sa ahensya, 18 ang mga bag-o nga kaso nga nagdugang sa Christmas Day, Disyembre 25. Mas manubo na ini nga tally ipaanggid sa 28 cases nga na-rekord sa amo man nga adlaw sang nagligad nga tuig.
Ini nga firecracker-related injuries ang gina-monitor subong sa 62 sentinel hospitals sa bilog nga pungsod.
Sa 43 nga mga pasyente, 34 ang naga-edad 19-anyos panubo kag anum naman ang 20-anyos pasaka. Kun gender naman ang pagahambalan, 39 sa mga biktima ang mga lalaki samtang apat naman ang mga babaye.
Gin-report man sang DOH nga 86% sa sini nga mga kaso ang resulta sang paggamit sang iligal nga palupok.
Matandaan nga una na nagpahanumdom ang Philippine National Police nga indi dapat magsindi sang firecrackers sa residential areas kun naga-welcome sa 2025. Gina-abisuhan man ang publiko nga indi na maggamit sang prohibited firecrackers kaangay sang watusi, piccolo, kag masobra 20 ka iban pa.
Sa bahin sang DOH, gina-abiso sa publiko nga maglikaw sa paggamit sang fireworks kun magselebrar sini nga holidays. Sa baylo, gina-engganyo ang paggamit sang drums, busina, kag iban pa nga alternatibo nga bagay nga mahimo makatuga sang gahod.
