𝗜𝗟𝗢𝗜𝗟𝗢 – Padayon pa sa gihapon nga ginapangita sang mga otoridad ang anay katapo sang Philippine Army nga nagluthang-patay sa Barangay Tanod sa Brgy. Cau-ayan, Pototan, Iloilo.
Ang biktima amo si alyas Rose, 34, samtang ang suspek naman amo si alyas Roger 59, lunsay residente sang amo nga lugar.
Sa interview sang Bombo Radyo kay Police Staff Sergeant Noli Peñarubia, imbestigador sang Pototan Municipal Police Station, iya ginpahayag nga nagpalagyo ang suspek matapos ang ginhimo nga krimen sang Disyembre 23.
Suno kay Peñarubia, santo sa ila pagpangusisa, nag-absent without official leave (AWOL) ang suspek sa militar.
Isa naman sa mga anggulo sa krimen amo ang daan nga hiligut-anon bangud suno sa iloy sang biktima, naakig ang suspek sa iya anak bangud sa pagsaway sa iya sang naga-videoke ini sa dis-oras sang kagab-ihon.
Nahibaluan nga pauli na kuntani si Rose sang naagyan siya ni Roger sa diin nagbaisay ang mga ini.
Diri na kag ginluthang ni Roger si Rose sa dughan kag tiyan gamit ang .45 caliber pistol nga amo ang gintunaan sang iya kamatayon.
Natukiban man nga may daan na nga police record si Roger sa diin may ginpatay man ini nga babaye sa amo man nga banwa.
– 𝗪𝗶𝘁𝗵 𝗮 𝗿𝗲𝗽𝗼𝗿𝘁 𝗳𝗿𝗼𝗺 𝗕𝗼𝗺𝗯𝗼 𝗝𝗼𝗺𝗮𝗿 𝗩𝗶𝗹𝗹𝗮
