Nagbanggi-anay sang mga mainit tinaga nga “disrespectful” kag “unethical” si Mayor Jerry Treñas kag Iloilo City District Engineering Office Head Engineer Roy Pacanan bangud sa ginapasuni delayed nga drainage project sa JM Basa Street, Iloilo City Proper.
Santo sa sulat ni Engineer Roy Pacanan, ginapanindugan sini nga sugod sang gindeklarar siya nga persona non grata ni Treñas, lunsay ‘personal’ na ang mga ginahaboy nga akusasyon sang alkalde kag sa iya nga opisina.
Ginpat-od man ni Pacanan nga ginpabuyan-buyanan lang sang city government ang ila requests nga masuguran na kontani ang drainage project paagi sa meeting sang nagligad nga Prebrero, kon sa diin, Septyembre na sang nakabaton sila sang sabat.
Ginpanginwala man sang natungdan nga nagpasalig ang ila opisina nga matapos ang proyekto sa Disyembre 13, baliskad sa ginpahayag sang alkalde.
Sa pahayag naman nga ginpaguwa ni Mayor Treñas, nagagawa nga nanghugas sang ila kamot ang opisina ni Engineer Roy Pacanan sa kon sin-o ang dapat basulon sa natuga nga perwisyo sa drainage project.
Ginbuyagyag man ni Treñas nga natukiban nga wala nakakuha sang pila ka permits ang proyekto sang Iloilo City District Engineering Office, bagay nga gintawag sini si Pacanan nga “disrespectful kag unethical” bangud sa kakulangan sini sa pagkumpleto sang mga requirements.
Nagapati man ang alkalde nga ginapalayo lang sang District Engineering Office ang isyu sa delayed nga proyekto nga nagtuga sang huol sa trapiko kag vendors paagi sa paghaboy sang basol sa city government.
