𝗣𝗔𝗦𝗦𝗜 𝗖𝗜𝗧𝗬 – Patay ang isa ka amay nga nagasakay sa tricycle matapos nabungguan sang van sa Barangay Punong, Passi City.
Ang biktima amo si Edmar Pareñas, residente sang Barangay Rumbang, Pototan, Iloilo samtang ang driver naman sang van amo si Noriel Simba sang Barangay Namocon, Leon, Iloilo.
Sa interview sang Bombo Radyo kay Police Captain Maria Rosario Miranda, Deputy Chief of Police sang Passi City Police Station, iya ginpahayag nga padulong kuntani ang biktima sakay sang iya 10 ka tuig nga anak sa Estancia, Iloilo samtang padulong naman ang van sa Caticlan sa Malay, Aklan.
Nagpondo ang biktima sa kilid sang dalan agud kuntani magkuha sang iya sunglasses, apang wala ini nakit-an sang van rason nga nabungguan ini.
Suno kay Miranda, madasig ang pagmaneho sang van sa diin wala sini nakit-an ang tricycle rason nga nabungguan niya ini.
Sa subong, ginahibalo pa kun mapasaka sang kaso ang pamilya sang biktima sa driver sang van.
– 𝗪𝗶𝘁𝗵 𝗮 𝗿𝗲𝗽𝗼𝗿𝘁 𝗳𝗿𝗼𝗺 𝗕𝗼𝗺𝗯𝗼 𝗛𝗮𝗻𝗻𝗮 𝗝𝗼𝘆 𝗔𝗻𝗱𝗮𝘀𝗮
