Ginkumpirma sang otoridad nga isa ka highly-decorated soldier kag active-duty US Army Green Beret ang nagadala sang Tesla Cybertruck nga amo ang nagsigabong sa guwa sang Trump hotel sa Las Vegas, Nevada, USA.
Ini amo si Matthew Alan Livelsberger, 37, nga naka-leave sa trabaho sang adlaw nga natabo ang insidente kag bag-o lang nakabalik sa US halin sa iya overseas assignment sa Germany.
Napatay man si Livelsberger matapos sini gintiro ang iya kaugalingon sa sulod mismo sang salakyan.
Isa siya ka Army Special Forces operations master sergeant kag yara sa active duty sa Germany kaupod sa 10th Special Forces Group apang naka-leave sang natabo ang insidente.
Ang US Special Forces ukon ginatawag nga “Green Berets” amo ang elite fighting force nga bantog sa guerilla warfare kag unconventional tactics sa luwas sang pungsod.
Sang natabo ang insidente, gin-park anay ang electric vehicle sa guwa sa glass entrance sang Trump International Hotel antes ini nagsigabong kag napilasan man ang pito ka iban pa nga mga tawo.
Iban pa sa nakit-an sa sulod sang truck amo ang second firearm, fireworks, passport, military ID, credit cards, iPhone kag smartwatch.
May pito man nga napilasan kasunod sa insidente apang wala sang daku nga halit sa hotel.
Base kay Clark County Sheriff Kevin McMahill, posible nga nagplano si Livelsberger sang mas makahalalit nga atake apang ang steel-sided vehicle nga iya gingamit ang nag-absorb sang kadam-an sang pwersa halin sa explosive.
“The level of sophistication is not what we would expect from an individual with this type of military experience,” suno kay Kenny Cooper, isa ka special agent nga in charge para sa Bureau of Alcohol, Tobacco, Firearms and Explosives.
Ginatumod pa sang otoridad kun ano gid ang motibo sang soldado.#
