Nanindugan ang Palasyo sang Malacañang nga indi ini magpasilabot sa Social Security System (SSS) sa pagpatuman sang rate hike sa kontribusyon sang mga myembro sini.
Suno kay Executive Secretary Lucas Bersamin, nagasalig ini sa Sistema sang amo nga social insurance agency kag maid-id nila ini nga gintun-an.
Ginpahayag ni Bersamin nga ang pagpasilabot sa management sang SSS sa ila mga programa ang indi nagakadapat kag posible nga may negatibo pa ini nga epekto gani mas maayo nga hatagan sang kahigayunan kag makahimo sang resulta.
Suno pa kay Bersamin, possible nga ang proposal nga i- suspend ang last tranche sang contribution hike ang politically motivated.
Gintumod niya nga isa sa nagaduso sang suspension sang contribution rate hike amo si former SSS president Rolando Macasaet nga nagahandom nga makakuha sang party-list post sa 2025 midterm elections.
May mga labor groups man kag iban nga mamalidha ang una na nagpanawagan kay President Ferdinand Marcos Jr. kag sa SSS nga i-suspend ang contribution hike.
Nasaad sa Republic Act (RA) No. 11199 ukon ang Social Security Act of 2018 nga ang SSS ang magapataas sang contribution rate kada duha ka tuig kag ang final increase ang subong nga 2025.
Sang 2019, ang contribution rate yara sa 12 percent.
Nagsaka ini sa 13 percent sang 2021 kag nangin 14 percent sang 2023.
Ang kontribusyon ang iga-share sang employer kag employee.
Para sa 15 percent contribution rate subong nga tuig, 10 percent ang baydan sang employer, samtang ang empleyado naman ang magabayad sang nabilin nga 5 percent.
