Magapatigayon ang Armed Forces of the Philippines (AFP) sang intelligence operations agud ma-id-id nga ma-check ang background sang mga kandidato sa 2025 midterm elections.
Suno kay AFP Chief of Staff General Romeo Brawner Jr., plano nila nga i-report ang resulta sang ila operasyon sa Commission on Elections (Comelec) ilabi na ang kandidato nga nakitaan sang kamala-malahan ukon red flags.
Ginsiling ni Brawner nga naga-isa sila sa tinutuyo sang Comelec kag Philippine National Police (PNP) para sa matawhay nge eleksyon.
“This initiative is conducted in coordination with the Comelec and PNP and focuses on identifying potential security threats arising from foreign interference and malign influence,” kabahin naman sang statement sang AFP. “Any findings will be confidentially relayed to the Comelec for appropriate action.”
Pahayag pa ni Brawner, gina-address na nila subong ang mga isyu kaangay sang private armed groups, kag ang ginaalegar nga permit to campaign kag permit to win nga iya sang New People’s Army (NPA).
Sa mismo adlaw naman sang eleksyon, magapadala ang AFP sang tropa kag assets agud nga masuportahan ang komisyon sa mga ulubrahon.
Siguruhon man sang military nga safe ang pagbyahe sang election materials kag may proteksyon man sa mga personnel sang poll body amo man ang police force sa idalom sang supervision kag direction sang Comelec.
