𝗜𝗟𝗢𝗜𝗟𝗢 𝗖𝗜𝗧𝗬 – Nakarecord na ang Western Visayas sang pinakauna nga persona nga naglapas sa Gun ban sang Commission on Elections (COMELEC).
Nahibaluan nga subong nga adlaw ang umpisa sang Gun ban bilang kabahin sang May 2025 elections.
Ang arestado amo si Ryan Anthony Jugao Soliva, 41, high school graduate, Businessman, kag residente sang Barangay Tabuc Suba, Jaro, Iloilo City.
Sa interview sang Bombo Radyo kay Police Captain Gimel Acuesta, hepe sang Iloilo City Police Station 9, iya ginpahayag nga bangud sa tuman nga katuyo sang driver, gin-arado sini ang baligyaan sang bibingka sa gwa sang Jaro Plaza sa Barangay Seminaryo, Jaro, Iloilo City ukon sa atubang sang Jaro Metropolitan Cathedral.
Suno kay Acuesta, gilayon sila nga nagreposponde sa lugar kag pinaagi sa plain view, nakit-an nila ang mga de kalire nga armas sa driver seat.
Ang lawful search ang ginpatigayon sa atubang mismo sang iya girlfriend kag sang media.
Lakip sa mga recoveries amo duha ka Smith and Wesson Springfield caliber 9mm pistol nga may duha man ka mga magazine kag 16 tanan ka mga bala kag isa ka Armalite M15A2 rifle nga may walo ka magazine kag 251 ka mga bala.
Wala naman sang may ginpakita nga mga papeles ang driver nga nagapamatuod nga lisyensyado ang iya mga armas.
Sa subong, preso na ini sa Iloilo City Police Station 9 kag nagapangatubang sang sampaw-sampaw nga kaso.
Ini amo ang paglapas sa gun ban sa idalom sang COMELEC Resolution No. 11067 kag paglapas sa Republic Act No. 10591 ukon “Comprehensive Firearms and Ammunition Regulation Act.
Bangud naman sa pag-arado sini sa baligyaan sang mga bibingka, mahimo man ini mag-atubang sang kaso nga paglapas sa reckless imprudence resulting in damage to property kag reckless imprudence resulting in slight physical injuries.
-𝗪𝗶𝘁𝗵 𝗮 𝗿𝗲𝗽𝗼𝗿𝘁 𝗳𝗿𝗼𝗺 𝗕𝗼𝗺𝗯𝗼 𝗝𝗼𝗺𝗮𝗿 𝗩𝗶𝗹𝗹𝗮
