Nagtipon sa Iloilo City ang kapin ginabanta 30,000 nga mga myembro sang Iglesia ni Cristo para sa National Rally for Peace.
Ginpatigayon ang aktibidad sa Iloilo Freedom Grandstand.
Nagtambong sa kahiwatan ang mga myembro sang religious group gikan sa nagkalain-lain nga bahin sang Panay.
Sa interview sang Bombo Radyo kay John Mark Zarandin, member sang Iglesia ni Cristo, iya ginpahayag nga sa Aklan pa sila naghalin para sa kahiwatan.
Suno sa iya, ang pagtambong niya sa “National Rally for Peace” sang Iglesia ni Cristo amo nga suportahan ang pahayag ni President Ferdinand Marcos, Jr. nga indi na lang mag-file sang impeachment complaints batok kay Vice President Sara Duterte.
Matandaan nga ginsuportahan sang INC ang UNITEAM ukon tandem nanday Marcos kag Duterte sang 2022 elections.
Sa subong, tatlo ka impeachment complaints ang ginapangatubang ni Sara nga lunsay nag-ugat sa kontrobersyal nga confidential funds sang Office of the Vice President kag Department of Education nga iya man anay ginpamunuan antes siya nagbiya sa Gabinete ni Marcos.
