Ginkumpirma ni Coach Tim Cone nga maga-upod si Troy Rosario sa Gilas Pilipinas para sa third window sang 2025 Fiba Asia Cup Qualifiers.
Ang 32-anyos nga 6-foot-7 shooting ace sang Barangay Ginebra amo ang igabulos ni Cone matapos nakaangkon sang injuries sanday Kai Sotto kag Kevin Quiambao kag wala pa sang kasiguruhan kun ano kadugay ang masarangan ni Jamie Malonzo sa paghampang.
Maga-umpisa na sa training ang national team sa Doha, Qatar subong nga bulan agud handaan ang third kag final window sang Asian Cup qualifiers kun sa diin atubangon sang Gilas ang Chinese Taipei (Feb. 20) kag New Zealand (Feb. 23).
Nahibaluan nga sa nagapadayon nga PBA Commissioner’s Cup, daku man nga bagay ang nahimo ni Rosario sa depensa kag opensa sang Gin Kings apisar bag-o pa lamang ini sa team.
Antes nakabalik sa Gilas pool subong nga 2025, may pila man ini ka eksperyensya sa nationals lakip ang 2021 Southeast Asian Games kun sa diin nakuha ang silver medal.
Bisan ano pa ang resulta sang hampang sa final window, nahibaluan nga kuwalipikado na ang Gilas sa Fiba Asia Cup 2025 nga natalana sa Agusto sa Jeddah, Saudi Arabia matapos nangin undefeated sa duha ka nauna nga windows.
