Nag-istoryahanay sanday United States President-elect Donald Trump kag Chinese President Xi Jinping sa telepono inadlaw antes ang natalana nga pagbalik sang 78-anyos nga Republican sa White House.
Base sa reports sang Chinese media, mismo ang American leader ang nag-request sang tawag, kag luyag man sini nga magkit-anay pa gid sila sang Chinese president.
Nangin positibo ang approach sang duha ka lider kun paano ma-improve ang relasyon sang ila mga nasyon nga ginatawag subong nga rival countries.
Suno kay Xi, nagalaum siya sang maayo nga panugod kaupod kay Trump, samtang nagpahayag naman si Trump nga nagalaum siya nga madamo sang masolbar nga problema paagi sa pag-updanay sang China kag US.
Kun matandaan, sang campaign period, isa ang China sa ginpahog ni Trump nga pasakaan ang taripa, apang ginsiling man sini anay nga bukas gid siya sa dayalogo kay Xi nga isa ka lider nga madugay na niya nga ginadayaw.
Suno kay Trump, lakip sa ila naistoryahan amo ang trade, Fentanyl, ang TikTok kag ang iban pa nga mga isyu sa tunga sang duha ka nasyon.
Matandaan nga sang nagligad nga tuig, nagpasar ang US Congress sang layi nga ibaligya sang Chinese parent company nga ByteDance ang short-video app nga TikTok, bangud kun indi, epektibo sa Domingo, i-ban na ini sa Estados Unidos sang Amerika.
Gin-uphold sang Korte Suprema ini nga desisyon apang ginapamatukan ini ni Trump.
Ini nga app sang China nga ginagamit sang masobra 170-million Americans ang ginapatihan sang iban nga instrumento sang China sa pagpang-espiya kag propaganda.
Antes ang pag-istoryahanay sang duha ka lider, gin-anunsyo man sang Chinese Foreign Ministry nga si Vice President Han Zheng ang magatambong sa swearing-in ceremony ni Trump bilang special representative ni Xi. Matandaan nga isa ka unusual invitation ang ginpadala ni Trump kay Xi sang Disyembre.
