Nagbubo ang mensahe sang kasubo halin sa mga personalidad sang Philippine entertainment industry kasunod sang kamatayon sang ginakabig nga original ‘Queen of Philippine Cinema’ nga si Gloria Romero.
Lakip sa nagkadto sa una nga gab-i sang haya amo ang veteran actress nga si Helen Gamboa, sanday Ai-Ai delas Alas, Barbara Perez, Tirso Cruz III, Gina de Venecia, Eric Quizon, Ricky Reyes, Celia Rodriguez, Boots Anson Roa Rodrigo, kag iban pa.
91-anyos si Gloria sang ginbawian sang kabuhi.
Nabun-ag ang nasambit nga showbiz royalty sa Denver, Colorado sang Dec. 16, 1933.
Sa iya bilog nga karera sa showbiz, nakit-an ini sa 250 movies and television shows kag nagpanglakaak gid ang abilidad sa screens ilabi na sa “Golden Age of Philippine Cinema” sang 1950s.
Nangin kilala siya sa mga pelikula nga Dalagang Ilocana (1954), Sino Ang May Sala (1957), kag Paru-Parong Bukid (1958). Pagkasunod nga dinekada, nagdugang pa ang pagtaas sang iya nalab-utan sa entertainment industry paagi sa Nagbabagang Luha (1988) kag Tanging Yaman (2000).
Ulihi siya nga nakit-an sa Rainbow’s Sunset nga Best Picture sa 2018 Metro Manila Film Festival. Sang amo nga tion, siya man ang Best Actress awardee sa iya performance sa LGBT-themed family drama kun sa diin kaupod sini ang late movie and theater legends nga sanday Eddie Garcia kag Tony Mabesa.
Patigayunon ang funeral sa aktres sa Arlington Memorial Chapel sa Quezon City. Subong nga adlaw tubtub buwas, pagatugutan sang pamilya ang public viewing.
